خلااااااص قررت اترك كل الريجيمات تعالوا اعرفوا ليش ؟

--------------------------------------------------------------------------------

السلام عليكم ورحمة الله وبركاته
اولا انا يابنات عضوة قديمه هنا لكن هذا معرف ثاني سويته لأسباب خاصه ..
انا متابعه من سنين لقسم السمنه والنحافه ومن رواده المخضرمين ههههه طبعا لاني سمينه ولي 7 سنوات احاول اوصل لوزني قبل الزواج الي كان 55 كيلو لكن للاسف كلها محاولات فاشلة ..
جلست مع نفسي قبل كم يوم وفكرت ليش كلما سويت ريجيم فشلت ؟ ..ليش مااستمر على ريجيم معين لاكثر من اسبوع او ايام ؟ ..ليش كلما بديت ريجيم احس بكآبه وضيقة صدر تخليني اتركه وارجع اخبص ؟ ..
وبعد بحث واستفسار عرفت السبب بعدما قريت تجارب البنات هنا الناجحه والي قدروا ماشاء الله عليهم ينحفوا انفسهم ويوصلوا للوزن المثالي ..
السبب ببساطه انهم اتبعوا نظام يناسبهم ويناسب طبيعة حياتهم وظروفهم ويرتاحون له نفسيا وهذا اهم شي ..
انا مثلا عندي دفتر مليان ريجيمات وكلهم ما طبقت ولا واحد فيهم صح ممكن اسويها لايام قليلة ثم اطفش وامل واكتئب وارجع اخبص وخصوصا اني مااحب الريجيمات المكتوبه الي تحدد لك الفطور كذا والغداء كذا والعشاء كذا احب اختار وجباتي بنفسي ومره حاولت اتبع نظام ترك العشاء وماقدرت لقيت نفسي اخر اليوم مكتئبه وتعبانه خصوصا ان ماعندي شغاله وعندي اطفال وطول اليوم اشتغل واصغر عيالي عمره 6 شهور يسهرني للفجر ومع السهر والشغل والتعب صعب اني اقعد 9 او 10 ساعات على المشروبات الساخنه والعصيرات والماء !!
علشان كذا قررت ارمي دفتر الريجيمات في الزباله وانتم بكرامه واشيلها كلها من راسي من اليوم ورايح مافيه ريجيم الدكتور فلان وعلان وريجيم العضوه فلانه وعلانه راح اسوي ريجيم ونظام لنفسي يناسبني ويناسب ظروفي وحياتي من الاكل المتوفر عندي دائما ومو لازم ارهق ميزانيتي بأكل معين اروح خصيصا علشان اشتريه وممكن القاه مره وماالقاه مررررات ..بيكون اكلي كله صحي من المسموح وابترك الممنوعات والسكر نهائيا واحرص انه يكون عشاي خفيف وبدري مع المشي والتمارين وان شاء الله اقدر اواصل لحدما اوصل للوزن المثالي حتى لو بعد سنه ..
بنات انا هدفي من الموضوع اني انصحكم انكم تختارون نظام يناسبكم ويريحكم ويناسب نمط حياتكم علشان ماتملون ويصيبكم اكتئاب واحباط والاكتئاب عن تجربه هو سبب فشل الريجيم وهو الي يخلينا نخبص ومانلتزم .. انا متابعه لقروبات كثيرة هنا من هوسي بالريجيم واتابع نتايجهم ولاحظت ان فيه بنات يدخلون في قروب معين ويتبعون الريجيم وهم مو حابينه او مو حابين الاكل الي فيه بس يجبرون انفسهم اذا شافوا نتايج الي نحفوا عليه وعلشان كذا تلقينهم مايلتزمون ويخبصون وبعد اسبوع يتركونه وهم متحطمين ويدورون غيره وتمر الشهور وهم تايهين بين الريجيمات بدون مايلتزمون او ينحفون ..
انك تلتزمين بنظام اكل صحي وتخفيف التزام تام وتستمرين عليه شهور متواصله بدون تخبيص افضل من انك تضيعين شهر واحد من عمرك وانتي تنتقلين من ريجيم لثاني وكلهم مغصوبه عليهم ومو مرتاحه لهم ..
اسفه ادري اني طولت عليكم ويمكن كلامي مو منظم بس اعتبروها فضفضه ونصيحه بنفس الوقت مافيه داعي نتبع الريجيم الفلاني او العلاني ونتعب انفسنا طالما اننا نعرف الاكل الصحي والمسموح والممنوع ونقدر ننظم وجباتنا بأنفسنا وكلنا صرنا خبيرين بالشي هذا ومع الاستمرار والالتزام والرياضه ان شاء الله ننحف بس اهم شي الاراده ..هذا رأيي والي معترضه عليه عادي ماعندي مشكلة اتقبل ارائكم بصدر رحب وهذي لكم ..

انا معاك ورايي من رايك

مشكوره غلاتي

موفقه يارب

يسلمووووووو
على الطرح